O reto de re-deseñar unha marca é, para min, maior que o de crear unha nova, sobre todo se é unha boa marca, como é o caso do Xacobeo deseñada en 1999 por Alberte Permuy.
O briefing definía que a marca non perdese a identidade anterior, xa implantada e recoñecida, coa necesidade de adaptarse ao entorno dixital.
A proposta foi unha marca renovada, a partir do logotipo utilizado no 2010, estilizando as nervaduras, o que achega dinamismo e volume, e dándolle un xiro de corenta e cinco graos, para aumentar a coherencia visual co símbolo das catro cunchas.




Créase ademais un logotipo novo, cunha letra personalizada a partir de investigar sobre tipografías galegas. Unha tipografía que encaixa co símbolo, e que crea unha marca compacta e limpa. Deste xeito conséguese unha imaxe fácilmente adaptable a todos os contornos, tanto analóxicos como dixitais, mantendo ao mesmo tempo a identidade de marca e todo o peso simbólico.




Marcas secundarias: Xacobeo Galicia e unha versión curta, cando por problemas de espazo ou visibilidade, se precise unha versión reducida.

Presentáronse os premios Galiciaparabéns, unha iniciativa da Axencia de Turismo de Galicia, dirixida a recoñecer aos concellos as iniciativas de conservación e de embelecemento das súas paisaxes e os seus núcleos de poboación.
Foi, precisamente, partir da idea da paisaxe, e en concreto, das montañas, onde atopei a inspiración para realizar a marca dos premios, unha "B" que se incorpora ao logotipo coa tipografía Kinetic -deseñada recetemente por María Ramos e Noel Pretorius-. A peza principal da marca é o trofeo, como representación do premio, deseñado a partir de diferentes 'bes' que conseguen crear un volume irregular e dinámico, realizado polo carpinteiro Víctor Domínguez de Vidoga.

Enlace a imaxes da marca en Behance

O proxecto Compostela, Territorio das Mulleres foi finalista na 5ª Bienal Iberoamericana de Deseño, formando tamén parte da exposición que foi inaugurada o pasado decembro, e que está aberta ata o 29 de xaneiro de 2017, na Sala Matadero de Madrid, e onde fun convidada a presentar o traballo realizado para a Concellaría de Igualdade do Concello de Santiago.








Uqui Permui na presentación do proxecto en Bid. Todos os vídeos das conferencias Bid en streaming aquí

Neste caso, o proxecto consistiu en dar forma ao libro sobre a historia do político e escritor Daniel Calzado Poceiro. Daniel foi un dos moitos protagonistas do movemento migratorio do rural galego durante o éxodo a América. A súa traxectoria transcorre principalmente en Arxentina, onde entra en contacto coa comunidade galega. Á súa volta a Galicia, continúa coa súa actividade reivindicativa na loita por cambiar as condicións de vida dos seus veciños, chegando a ser alcalde de Tomiño.




Á hora de expor a idea global do proxecto, e ao tratarse dunha figura cunha ampla traxectoria de loita social, escolleuse unha liña baseada na frescura e a proximidade. É por iso, que para o deseño da portada, créase unha ilustración a partir dun retrato fotográfico do propio protagonista. Tomando como referencia esta fotografía, realízase un retrato non convencional, mediante unha ilustración vectorial con trazos amables e redondeados. A paleta cromática está determinada por tons vibrantes entre sí que achegan gran dinamismo á composición grazas á superposición dos mesmos en determinadas partes do retrato. Noutras palabras, ponse énfase nas cores e as formas planas.

Inspirámonos na obra de ilustradores e deseñadores galegos, como Seoane ou Castelao, que están contextualizados na mesma época que Daniel Calzado. Tamén serve como inspiración, un tipo de ilustración que provén do movemento artístico alemán coñecido como Plakatstil. Este movemento foi fundado polo artista gráfico Lucian Bernhard en 1905. Os traballos do Pakatstil son facilmente reconocibles xa que utilizan as seguintes características: o cartel redúcese á imaxe icónica do produto (neste caso, do protagonista da publicación), uso de fondos planos e simplificación do contido (datos informativos mínimos, sen ornamentos nin figuras ou motivos compositivos de ningún tipo).




En canto á tipografía faise uso da creada polo estudo, a xeométrica Resol (Uqui Permui). A partir duns glifos con raíces e unha ampla historia, xa que toma as súas formas e nome da cabeceira da revista compostelá “Resol, hojilla volandera do pobo” editada por Anxel Casal en “Nós”. 
Trátase fundamentalmente, dunha tipografía modular construída a partir de formas xeométricas como o círculo e o cadrado, á súa vez, os trazos ascendentes e descendentes están moi simplificados para favorecer a lexibilidade e a comprensión dos caracteres.




En síntesis, esta tipografía contrasta perfectamente coa ilustración, dando como resultado final, unha composición moi limpa e icónica que fai referencia directa ao cartel propagandístico debido ao seu carácter ideolóxico e cuxa tipografía tamén fai referencia á comunidade social e cultural galega da época.