"Sempre libres e vivas" un libro sobre como poñer en marcha a acción transmedia En negro contra as violencias, unha acción que se converteu en símbolo grazas á apropiación da cidadanía.
Sempre libres e vivas. En negro contra as violencias de xénero é un berro á sensibilización social que, neste libro, recolle o resultado dunha campaña transmedia que se levou a cabo baixo unha perspectiva transversal, comunitaria e en rede para concienciar a cidadanía sobre a existencia de diferentes formas de violencia machista que constitúen un grave problema social. A dimensión comunitaria da campaña ten o seu principal reflexo na apropiación da mensaxe por parte da poboación destinataria e dos stakeholders. Apostou, tamén, por identificar, transmitir e incidir nos comportamentos e expresións que están detrás das violencias de xénero a través do uso de materiais de campaña específicos, de código aberto e de libre uso para toda a poboación.
Distribuie Consorcio Editorial Galego, e venda online voandolibre.gal
International Union of Architects / Union Internationale des Architectes (UIA)
Arquitectura web e deseño para a federación de organizacións profesionais que traballan para unificar aos profesionais da arquitectura, influír nas políticas públicas e promover a arquitectura ao servizo das necesidades da sociedade.
A complexidade deste traballo foi sobre todo conseguir unha arquitectura web robusta, sinxela e ao mesmo tempo cun deseño amable e accesible para territorios dispares.
web uia-architectes
O packaging de Sementares está a obter numerosos recoñecementos, o último foi o dos EUROPEAN DESIGN AWARDS 2024
European Design Awards, 2024 (Silver)
Premio Nort, 2024
Premio LATAMPACK de Ouro ao mellor envase eco amigable
Selección CLAP 2023 en branding e packaging, como mellor sistema de identidade corporativa.
Sementares é unha nova produtora de sementes multi-especies que aposta por recuperar un produto de calidade colaborando cos agricultores, analizando a rastrexabilidade e rexistrando variedades autóctonas a partir do material parental conservado nos bancos de Germoplasma de Galicia. Dadas as características da empresa a sustentabilidade ten que reflexarse tamén nos envases, buscando sempre materiais innovadores como o bio-base, en canto ao deseño xógase con cores vivas que identifican rapidamente ás diferentes familias do produto e destacan nos estantes das tendas especializadas en horticultura.
Proxecto lugares
Proxecto Lugares é unha iniciativa de pensamento contemporáneo, aprendizaxe e intervención paisaxística que se desenvolve no espazo público dunha das rutas máis transitadas en todo o mundo: o Camiño de Santiago.
Nace do cruzamento entre a arquitectura da paisaxe, a artesanía e o deseño, no eidocontemporáneo, coas comunidades locais que habitan territorios polos que transita o Camiño de Santiago.
A participación no proxecto foi de colaboración no desenvolvemento e de recoller a historia para narrala no libro. Do deseño global e da publicación, un libro que recolle todo o proceso, as xornadas e os taller.
Enlace ás publicacións (versión galego, castelán e inglés)
Tótems da Memoria Democrática, 2025
Este proxecto nace para facer visible os traballos de documentación, exhumación e identificación das vítimas do franquismo localizadas en distintos cemiterios de Galicia. Un labor de memoria levado a cabo polo grupo Histagra da Universidade de Santiago de Compostela.
Para marcar estes espazos e dignificar a súa historia, deseñáronse uns tótems inspirados nos antigos túmulos de pedra. O resultado é un totem que lembra un banco de pedra, cun respaldo elevado onde se integran paneis coa documentación recompilada en cada lugar.
Para desenvolver a proposta, realizouse unha investigación de campo que incluíu visitas aos sete cemiterios onde se instalarán os tótems, co fin de avaliar a viabilidade do elemento.
Esa investigación de campo serviu para adaptar a forma, o tamaño e a presenza do tótem ao contexto de cada espazo, sen impoñerse, sen romper o silencio natural que os envolve.
Na elección dos materiais combinouse o metal coa pedra —materia da terra e da paisaxe—. Buscáronse canteiras próximas que ofrecesen pedras semellantes ás dos muros e estruturas funerarias, para que os tótems formasen parte do lugar sen estridencias, coma se sempre estiveran alí.
Como parte da proposta, tamén se creou unha identidade visual propia: unha marca que axuda a recoñecer estes sinais da memoria, e que reforza a súa presenza simbólica e comunicativa.
